कोरोना संक्रमण सुरु भएपछि अति प्रभावित देशबाट एकमहिनामा १७ हजार बढी नेपाल प्रवेश

कोरोना भाइरसको संक्रमण तीब्रगतिमा फैलिन सुरु भएपछि नेपाल प्रवेश गर्ने चाइनिजहरुको संख्या ३५ सय भन्दा बढी रहेको छ । जनवरीको अन्तिम साता कोरोना भाइरसको संक्रमण तीब्र बन्दै गएको थियो । फरबरीमामात्र त्रिभुवन अन्तर्राष्ट्रिय विमानस्थलबाट ३२८५ जना चाइनिजहरु नेपाल प्रवेश गरेका छन् ।

जनवरी महिनामा भने त्रिभुवन अन्तर्राष्ट्रिय विमानस्थल हुँदै नेपाल प्रवेश गर्ने चाइनिजहरुको संख्या १२ हजार १६९ रहेको थियो । नेपाल सरकारले करोडौं खर्च गरेर तामझामका साथ भ्रमण वर्षको सुरुवात गरेकोमा चीनबाट धेरैभन्दा धेरै पर्यटकहरु भित्राउने लक्ष्य थिएको थियो । जति खर्च गरेपनि गतबर्षको सोही महिनाको तुलनामा चीनबाट नेपाल आउनेहरुको संख्या भने उल्लेख्य बृद्धि भएको थिएन । सन् २०१९ को जनवरीमा १२ हजार २ सय २ चाइनिजहरु त्रिभुवन अन्तर्राष्ट्रिय विमानस्थल हुँदै नेपाल आएका थिए ।

कोरोनाको संक्रमण फैलिन सुरु भएपछि फरबरी महिनामा भने ७७ हजार ६४ जना विदेशीहरु त्रिभुवन अन्तर्राष्ट्रिय विमानस्थल हुँदै नेपाल भित्रिएका छन् । जसमध्ये कोरोना अति प्रभावित साउथ कोरियाका १७०२ जना नेपाल प्रवेश गरेका छन् । फरबरीमा नेपाल प्रवेश गर्ने इटालियनको संख्या ६५३ रहेको छ ।

त्यस्तै फरबरीमा २६३६ जना जापानीहरु त्रिभुवन अन्तर्राष्ट्रिय विमानस्थल हुँदै नेपाल प्रवेश गरेका छन् भने फरबरीमा नेपाल प्रवेश गर्ने इरानीहरु १ सय जना रहेका छन् । अहिलेसम्म पनि ती देशहरुबाट अन अराइभल भिसामा पर्यटकहरु प्रवेश गरिरहेका छन् । तर मार्च १० पछि भने नेपालले चीन, साउथ कोरिया, जापान, इटली र इरानका नागरिकलाई अन अराइभल भिसामा रोक लगाउने भएको छ ।

फरबरीमा त्रिभुवन अन्तर्राष्ट्रिय विमानस्थल हुँदै नेपाल आउने भारतीयहरुको संख्या १ लाख ६५ हजार ५८ रहेको छ । भारतीयपछि चाइनिजलाई उछिन्दै अमेरिकन पासपोर्टवाहकहरु नेपाल प्रवेश गरेका छन् । फरबरीमा ६ हजार ४ सय ४२ जना अमेरिकनहरु त्रिभुवन अन्तर्राष्ट्रिय विमानस्थल हुँदै नेपाल प्रवेश गरेको नेपाल सरकारको अध्यागमन विभागको तथ्यांकले देखाएको छ । यही अवधिमा नेपाल प्रवेश गर्ने बेलायतीहरु भने ४७ सय ३२ जना रहेका छन् ।

Leave a Reply

Your email address will not be published. Required fields are marked *

%d bloggers like this: