श्रद्धाञ्जली सभा तथा दिप प्रज्वलन कार्यक्रम सम्पन्न

भगवती न्याैपाने कपिलवस्तु, असोज ४ // मेची महाकाली बुहारी संयुक्त आवाजको आयोजनामा श्रद्धाञ्जली सभा तथा दिप प्रज्वलन कार्यक्रम सम्पन्न गरिएको छ । महिला तथा बालबालिका हिंसा विरुद्धको हाम्रो अभियान भन्ने मूल नाराका साथ अभियानमा लागेको मेची महाकाली संयुक्त बुहारी आवाज कपिलवस्तुले आइतवार साँझ ४ नं चोकमा मृतक करुणाको संम्झनामा श्रद्धाञ्जली सभा तथा दिप प्रज्वलन कार्यक्रम सम्पन्न गरेको हो ।
कार्यक्रममा प्रदेश सभा सदस्य रिना नेपालले ३ तहको सरकार बने पनि समाजमा पुरातन संस्कारलाई फाल्न नसकिएको बताउनुभयो । उहाँले संघीय लोकतन्त्र देशमा रहेपनि समाजमा परिवर्तन नभएको जिकिर गर्नुभयो । एउटै गर्भबाट जन्मेकी छोरीको पनि सुरक्षित नभएको बताउनुभयो ।
यस्तै वाणगंगा नगरपालिका वडा नं १ का वडा अध्यक्ष बालकुमारी पन्त अधिकारीले देशको कानुन कागजको पानामा मात्रै सिमित भएको बताउँदै छोरा छोरी दुवैलाई सभ्य संस्कार सिकाउनुपर्नेमा जोड दिनुभयो ।
संस्थाको लुम्बिनी अञ्चल विशेष सल्लाहकार गंगा के.सी., रुपन्देही जिल्ला संयोजक लता खड्काले नारीहरुले अझै पनि अकालमा ज्यान गुमाउनुपरेको र पीडित परिवारले न्याय नपाएको गुनासो गर्नुभयो ।
स्वर्गीय करुणाकी आमाले आफ्नी छोरीको विभत्सपूर्ण हत्या हुँदा पनि कानुनले हत्यारालाई दायरामा ल्याउन नसकेको दुःख व्यक्त गर्नुभयो । उहाँले विभिन्न ठाउँमा कानुनको ढोका ढकढकाउँदा पनि अपराधिलाई ढाकछोप गरेको गुनासो गर्नुभयो ।
जिल्ला संयोजक चन्द्रा अर्यालको अध्यक्षता उपाध्यक्ष सुष्मा खाँडको स्वागत मन्तव्यमा संचालन भएको कार्यक्रमको संचालन सचिव अञ्जु बन्जाडेले गर्नुभएको प्रेस सल्लाहकार भगवती न्यौपानेले जानकारी दिनुभयो । कार्यक्रममा रुपन्देही, कपिलवस्तुका पदाधिकारी, समाजसेवी, स्थानीय, बुद्धिजिवी, संचारकर्मी लगायतको सहभागिता रहेको थियो ।

Leave a Reply

Your email address will not be published. Required fields are marked *

%d bloggers like this: